ਬਿਨ ਕੋਈ ਤੇਗ ਚਲਾਇਆਂ ਵੀ ਓਹ
ਸਤਿਗੁਰ ਤੇਗ ਬਹਾਦਰ ਜੀ ਸਨ
ਬਿਨ ਕੋਈ ਖੂਨ ਵਹਾਇਆਂ ਹੀ ਓਹ
ਸਤਿਗੁਰ ਤੇਗ ਬਹਾਦਰ ਜੀ ਸਨ
ਜੰਝੂ ਦੀ ਜਿਨ੍ਹਾਂ ਨੇ ਰੱਖਿਆ ਕੀਤੀ
ਸਤਿਗੁਰ ਤੇਗ ਬਹਾਦਰ ਜੀ ਸਨ
ਜਿਸ ਨੇ ਦਿੱਤੀ ਆਪ ਸ਼ਹੀਦੀ ਓਹ
ਸਤਿਗੁਰ ਤੇਗ ਬਹਾਦਰ ਜੀ ਸਨ
ਔਰੰਗਜ਼ੇਬ ਦੀ ਜ਼ੁਲਮ ਦੀ ਨੀਤੀ
ਓਹ ਨੀਤੀ ਨਹੀਂ ਬਸ ਬਦਨੀਤੀ ਸੀ
ਬਦਲੋ ਧਰਮ ਮੁਸਲਿਮ ਬਣ ਜਾਓ
ਇਹ ਉਸ ਦੀ ਇੱਕ ਕੁਰੀਤੀ ਸੀ
ਪੰਡਿਤ ਕਸ਼ਮੀਰੀ ਸ਼ਰਨ ‘ਚ ਆਏ
ਬਿਨਤੀ ਸਤਿਗੁਰ ਨੂੰ ਕੀਤੀ ਜਦ
ਸਭ ਅੱਖਾਂ ਵਿੱਚੋ ਨੀਰ ਵਹਾਉਂਦੇ
ਸੀ ਜੀਭ ਓਹਨਾਂ ਦੀ ਸੀਤੀ ਤਦ
ਜ਼ੁਲਮ ਦੇ ਅੱਗੇ ਸਾਡਾ ਵਾਹ ਨਾ ਚੱਲੇ
ਅਸੀਂ ਸ਼ਰਨ ਤੁਹਾਡੀ ਆਏ ਹਾਂ
ਔਰੰਗਜ਼ੇਬ ਦੀਆਂ ਚਾਲਾਂ ਦੇ ਮਾਰੇ
ਅਸੀਂ ਦੁਖੀ ਅਤੇ ਬਹੁਤ ਸਤਾਏ ਹਾਂ
ਸੁਣ ਕੇ ਵਿੱਥਿਆ ਸਭ ਸਤਿਗੁਰ ਨੇ
ਫਿਰ ਇਹੋ ਗੱਲ ਇੱਕ ਸੁਣਾਈ ਸੀ
ਬਲੀਦਾਨ ਦੇਣ ਦੀ ਕਿਸੇ ਸੰਤ ਦੀ
ਹੁਣ ਹੈ ਫਿਰ ਵਾਰੀ ਆਈ ਜੀ
ਬਾਲ ਗੋਬਿੰਦ ਜੀ ਕੋਲ ਖੜ੍ਹੇ ਸੀ
ਉਸ ਇਹੋ ਆਖ ਸੁਣਾਇਆ ਸੀ
ਆਪ ਤੋਂ ਵੱਡਾ ਕਿਹੜਾ ਹੈ ਜੋ ਇਸ
ਦੁਨੀਆਂ ਦੇ ਅੰਦਰ ਆਇਆ ਜੀ
ਇਸੇ ਲਈ ਗੁਰੂ ਤੇਗ ਬਹਾਦਰ
ਸੰਦੇਸ਼ਾ ਇਹ ਸੀ ਭਿਜਵਾਇਆ
ਇਹਨਾਂ ਨੂੰ ਛੱਡ ਤੂੰ ਮੈਨੂੰ ਫੜ ਲੈ
ਮੈਂ ਖੁਦ ਦਿੱਲੀ ਚੱਲ ਕੇ ਆਇਆ
ਦੇ ਕੇ ਸ਼ਹਾਦਤ ਧਰਮ ਦੀ ਖਾਤਰ
ਓਹਨਾਂ ਕੰਮ ਕੀਤਾ ਲਾਸਾਨੀ ਸੀ
ਸ਼ਾਇਦ ਅਜੇ. ਵੀ ਉਸ ਕਰਮ ਦੀ
ਕੀਮਤ ਨਹੀਂ ਅਸਾਂ ਹੈ ਜਾਨੀ ਜੀ
ਅਸੀਂ ਹੱਕ-ਸੱਚ ਤੇ ਧਰਮ ਵਾਲੇ
ਜ਼ਜਬੇ ਨੂੰ ਮਰਨ ਨਹੀਂ ਦੇਣਾ ਹੈ
‘ਇੰਦਰ’ ਜ਼ੁਲਮ ਆਪ ਨਾ ਕਰਨਾ
ਕਿਸੇ ਨੂੰ ਕਰਨ ਨਹੀਂ ਦੇਣਾ ਹੈ
ਇੰਦਰ ਪਾਲ ਸਿੰਘ – ਪਟਿਆਲਾ

ਧੰਨ ਧੰਨ ਸ਼੍ਰੀ ਗੁਰੂ ਤੇਗ਼ ਬਹਾਦੁਰ ਜੀ ****
ਜਾ ਦਿੱਲੀ ਸੀਸ ਕਟਾਇਆ, ਗੁਰੂ ਤੇਗ ਬਹਾਦੁਰ।
ਡੁੱਬਦਾ ਧਰਮ ਬਚਾਇਆ, ਗੁਰੂ ਤੇਗ ਬਹਾਦੁਰ।
ਕੀਤੀਆਂ ਜ਼ੁਲਮ ਦੀਆਂ ਸੀ ਹੱਦਾਂ ਪਾਰ ਔਰੰਗੇ ਨੇ
ਬਣ ਮਸੀਹਾ ਫਿਰ ਆਇਆ, ਗੁਰੂ ਤੇਗ ਬਹਾਦੁਰ।
ਸਵਾ ਮਣ ਜਨੇਊ ਉਤਾਰ ਕੇ ਰੋਟੀ ਖਾਂਦਾ ਸੀ ਪਾਪੀ
ਕਿ ਪਾਪ ਨੂੰ ਬੰਨ੍ਹਾ ਲਾਇਆ, ਗੁਰੂ ਤੇਗ ਬਹਾਦੁਰ।
ਭਾਈ ਸਤੀ ਦਾਸ ਜੀ ਨੂੰ ਸਾਹਮਣੇ ਸੀ ਸਾੜ ਦਿੱਤਾ
ਰੱਤਾ ਨਾ ਸਿਦਕ ਡੋਲਾਇਆ, ਗੁਰੂ ਤੇਗ ਬਹਾਦੁਰ।
ਭਾਈ ਮਤੀ ਦਾਸ ਜੀ ਦੇ ਵੀ ਚੱਲਿਆ ਸੀਸ ਤੇ ਆਰਾ
ਸੀ ਜਪੁਜੀ ਜਾਪ ਜਪਾਇਆ, ਗੁਰੂ ਤੇਗ ਬਹਾਦੁਰ।
ਵਿੱਚ ਦੇਗ ਉਬਾਲੇ ਖਾ ਗਿਆ ਭਾਈ ਦਿਆਲਾ ਜੀ
ਇਹ ਕੈਸਾ ਸਿੱਖ ਬਣਾਇਆ, ਗੁਰੂ ਤੇਗ਼ ਬਹਾਦੁਰ।
ਦੇ ਤਸੀਹੇ ਉਹ ਹੰਭ ਗਏ, ਉਹ ਹਾਰ ਗਏ ਜ਼ਾਲਿਮ
ਦਿੱਤਾ ਸੀਸ, ਨਾ ਝੁਕਾਇਆ, ਗੁਰੂ ਤੇਗ਼ ਬਹਾਦੁਰ।
ਪਾ ਰੱਤ ਬੁਝਦੇ ਦੀਪ ਜਗਾ ਦਿੱਤੇ ਵਿੱਚ ਮੰਦਿਰਾਂ ਦੇ
ਧਰਮ ਦੀ ਚਾਦਰ ਕਹਾਇਆ, ਗੁਰੂ ਤੇਗ਼ ਬਹਾਦੁਰ।
:- ਗੁਰਪ੍ਰੀਤ ਸਿੰਘ “ਨਮੋਲ”